السبت، 20 ديسمبر 2008

كيف تصبح زعيما على شلتك ؟

أحب أوضح فى الاول إن الموضوع ده سيأخذ منك وقتا لا يقل عن سنتين حتى تنجح فيه و سيؤثر هذا فى شخصيتك تأثيرا أيجابيا:
1-أول حاجة لازم تقوم بتأسيس شلة جديدة حيث تصبح أنت الشخصية الاولى فى شلتك.
2-قوم بتعريف أفراد شلتك على بعض أى تعرف على كل شخص جديد لوحدة ثم قدمة لباقى أفراد الشلة حيث يكون لك الفضل فى تعريف أفراد الشلة على بعض.
3-قبل تقديم أى شخص جديد لشلتك تكلم عنه جيدا و عن أى مميزات تجدها فيه أمام أفراد شلتك و كذلك تحدث لهذا الشخص جيدا عن أفراد شلتك و عن مميزاتهم حتى يتولد لدى الطرفان الرغبة فى التعرف على بعض.
4-عند تقديم شخص جديد لشلتلك التى تقوم بتأسيسها دعهم يتكلموا مع بعض و قم أنت فقط بتوجيه الحديث حتى يتعرفوا على بعض أكثر فأكثر و يشعروا بأنهم أصدقاء من زمان.
5-إذا أراد أحد أفراد الشلة بتقديم صديق له للشلة .تعرف عليه انت أولا ثم قدمه أنت للشلة.
6-يجب أن تصبح متميزا فى شلتك سواء(بثقافتك و أطلاعك-إجادة لغة ما-تميزك فى دراستك-تميزك فى شغلك....إلخ) بحيث يجدون ما ينقصهم فيك أنت.
7-يجب أن تكون مستمع جيد لهم . أى دعهم يتحدثوا لك بما فى داخلهم و مشاكلهم الشخصية ولا تعطى لهم أذنك فقط بل و أنتباهك و حاول فى أيجاد حل لمشاكلهم بحيث يشعروا بالامان معك و تصبح بمثابة أباً لهم.
8-قدم لهم يد العون بكل شئ تستطيع مساعدتهم به (يعنى تكون جدع معاهم ).
9-إجعلهم يختاورن كل شئ و لكن بمزاجك و إفعل هذا بذكاء
مثل: إحنا لما نسافر إسكندرية حنسافر بإيه(بالعربية ولا بالاتوبيس).فأنت تركت لهم حرية الاختيار و لكن من أختياراتك أنت بدون أن يشعروا.
10-فى غياب اى فرد من افراد الشلة تحدث عنه جيدا حتى لو كان سئ لأن هذا الكلام سيصل له و بالتالى لن تزيد معزتك عنده فقط بل و عند كل أفراد الشلة.
11-قم بتجميع شلتك بالكامل من حين لآخر حتى يشعروا بأنك الشخص الوحيد الذى تقوم بتجميعهم بعد ربنا.وهذا سيؤثر فى خضوعهم لك.

.فى واحد ييجى يقول طب أنا عايز أتزعم شلتى الحالية.حقول ليه كون شلة جيدة خاصة بيك و تزعمها الاول ثم قدمها الى شلتك الجديد بالطريقة التى عرفتك أياها فى التقديم.و بالتالى ستتزعم شلتك الحالية والجديدة.

. و لعلمكم يا جماعة ده عن واقع تجربة شخصية ليا وده بالضبط اللى أنا عملته حتى أتزعم شلة كبيرة جدا مليانه بشخصيات مختلفة و رائعة لحد ما أطلقوا عليا لقب الزعيم و ده اخد منى حوالى أربع سنين يعنى الموضوع عاوز وقت.

. فى الآخر أحب أقول أن الموضوع ده مش تافه بل فى غاية الروعة لإنك حتشعر بروعة القيادة و الزعامة و سيؤثر هذا فى شخصيتك بطريقة رائعة لأنك لن تكون قادرا على تكوين صداقات فحسب بل ستكون قادرا على التعرف على اى شخص يحلو لك و ستجتاز أيضا أى مقابلة شخصية سواء كان (للعمل-الزواج...وهكذا).

هناك 8 تعليقات:

Maha Shahen يقول...

حلوه الفكره قوى
بس مش لازم يكون الزعيم يعنى
بيكفى يطبق كل الكلام دا علشان يكون محبوب وانسان كويس
وبعدين احنا هنتصاحب على ناس علشان يكونوا اصحاب بجد ولا هنقعد بالسنين ندور ازاى نسيطر عليهم ههههههههه
بس فكرتك عن طريقة الوصول للزعامه حلوه وبتنفع احيانا بجد
وفى ناس بتوصل ليها منغير تخطيط هى بتيجى كدا
بس مشكور جدا على طرح الموضوع الجميل دا
حتى لو مقدرناش نوصل للزعامه على الاقل نكون نعم الاصدقاء لبعض

يا مراكبي يقول...

:-))

walaa tulip rose يقول...

صح .. بجد معاك حق لو كل واحد حب يتزعم شلته سواء في الجامعة او في العمل وقدر حتى ولو بس يجمع حواليه ناس بيحبوه ويحترموا رايه يبقي نجح مش بس في الشلة انما في الحياة ككل ....
رغم اني مش مع الزعامة بشكل خاص انما باشوف ان الزعامة ان الاخرين يحترموك ويحبوا وجودك معاهم وده فعلا حيخليك تقدر تكون ناجح في حياتك ومليان ثقة في نفسك
ربنا يوفقنا كلنا يارب
تقبل تحياتي

Resala يقول...

ياجامد يا ماماتو يا دبلوماسى يا خطير
بس انت عارف
انا خايف يوصلهم انك بتعمل كده عشان تبقى الزعيم بتاعهم
ساعتها هتتاكل علقه انما ايه
هههههههههههههههه
ربنا يستر عليك
لو عرفوه يبقى مش انا اللى قولتلهم
هاه؟

Bant EL7ag Dracula يقول...

على فكره كلامك صح جداااا بس الشخصيه الا تعرف تنفذ ممكن واحد يعمل كل دا وبردو ميكونش رائيس الشله

انا كنت al boosومازلت على الشله مع انى ممكن ما كنش بعمل نص الحجات دى

بس العامل الاكبر على الشخصيه الا تعرف تطبق وتعمل كدا

بس يا سيدى

باى بقا

YaQeeN يقول...

السلام عليكم..


انا تقريبا فى حاجات كنت بعملها من دى مع اصحابى بس كانت تلقائى جدا ومكنتش اقصد اكون فيها زعيمه للجروب بتاعى وخصوصا ان انا اللى عرفت الجروب بتاعى لبعض..
لكن عمرى ما فكرت الحقيقه انى اكون زعيمه للجروب خالص..وكلنا كده مع بعض تقريبا 7 بس كلنا فى نفس الوقت بنحتاج لبعض..
عيب الزعامه ان الكل اللى بحتاجلك لكن انت لما تحتاج لحد هتعمل ايه..

لكن بجد..
نصائحك كلها جميله اشكرك عليها مجهود جميل وانت تستاهل تكون زعيم للجروب مدام بتراعى ربنا فى تعاملك من اصدقائك..

Unknown يقول...

انا لدي داء الزعامة وداء العظمة وهذه الاشياء تعجبني وفكرتك جميلة جدا

Unknown يقول...

و الله حبيبتي نصيحتك مرة حلوة