الأحد، 19 أكتوبر 2008

حوار ساخن جدا مع قطة !.



كنت قاعد فى مرة من المرات فى منطقة ما فى القاهرة و بأكل شئ ما .المهم و أنا قاعد جت ناحيتى قطة و عمالة تنونو. بس كانت واقفة بعيد شوية.فقمت مديت ليها أيدى بحاجة من اللى كنت باكله و كنت مستنيها تيجى تاخدها من إيدى. و هى مستنية أرميهالها. المهم فضلنا على الحال ده بتاع خمس دقايق.فقمت سألتها :





أنا: إنتى ليه خايفة تيجى تاخدى الاكل من إيدى ؟


القطة: يا عم هو انا بس اللى بخاف ! ماهو انتم كلكم بتخافوا .


أنا: إحنا. إحنا مين ؟


القطة: إنتوا البنى أدمين.


أنا: بنخاف من إيه؟


القطة: من حاجات كتير.بتخافوا من الحياة و بتخافوا من اى حاجة جديدة و بتخافوا من النجاح و بتخاوفوا حتى من بعض.


أنا: ينفع توضحى اكتر ؟ أنا مش فاهم .


القطة: يعنى بتخافوا دايما من بكرة.دايما متشائمين.و بتخافوا تغيروا من طباعكم وبتخافوا تغيروا رتم حياتكم. بتخافوا تقولوا رأيكم بصراحة.وبتخافوا من أنكم تنجحوا فى حياتكم علشان فكركم ان النجاح حيفقدكم أعز أصحابكم.أو إن النجاح بيجيب معاه مشاكل و وجع دماغ و أر و حسد.


حتى الشباب منفض للحياه.بيبقى قاعد فى البيت ما بيعملش حاجة غير أنه يا اما نايم يا بياكل يا بيتفرج على التليفزيون يا قاعد على الكمبيوتر يا اما على النت بيعمل كلام فارغ يا بيتكلم فى كلام فارغ و حرام. و لو نزل الشارع يا اما على القهوة يا اما مع شوية شلة فاسدة وتلاقيهم بيتكلموا فى كلام فارغ يا اما بيعاكسوا فى بنات.


أنا: حيلك حيلك.طب ماهى دى الحياة و الظروف صعبة و مفيش شغل و كده يعنى....!


القطة: قطعا عن حديث حضرتك. بس سيادتك الشباب اصلا ما بيدوروش على شغل.لسببين.


أنا:إيه هما ؟


القطة:أولا-لأن الشباب كسلان و مش عاوز يبذل مجهود.


ثانيا-أو أن الشباب خايف إنه يترفض لما يتقدم لشغلانه.و المشكله مش أنه خايف أنه يترفض و بس.لكن ده متاكد و مقتنع أنه مرفوض من قبل ما يقدم أصلا.هو الشباب عرف منين أنه حيترفض اصلا.مش يجربوا؟ لكنهم خايفين.


أنا: ماهى أى شغلانة دلوقتى عايزة كمبيوتر و إنجليزى بالاضافة للغة تانية .


القطة: يعنى هى اى شغلانة عايزة كده؟ ولا هى حجة؟ ولا هما بيدوروا على الشغلانات اللى فلوسها 5000:4000ج.


ولنفترض أن سوق العمل كله محتاج الحاجات دى.طب الشباب ليه ما بيدرسوش الحاجات دى ؟ لانهم كسلانين.أو أنهم خايفين يفشلوا فى دراسة اللغات و الكمبيوتر.


أنا: الصراحة عندك حق.طب ينفع أصور حضرتك صورة؟ علشان حنزل الموضوع ده فى المدونة بتاعتى و عايز صورة حضرتك تنور مدونتى .


القطة: لا يا عم شكرا .


أنا:ليه؟


القطة: أنا خايفة يا عم لحسن تطلع أمن دولة ولا حاجة أنا مش ناقصة. و مش عايزة حتى منك الشيبسى اللى انت بتاكله.سلام

أنا:سلام.


على العموم أهى قالتلكم انا كنت باكل أيه.و يا دوب كنت حصورها لكن لفت و أدتنى قفاها كما حال الكثير منا !!!!!!!!


هناك 9 تعليقات:

ـ-ـ- أحمد عبد العدل-ـ-ـ يقول...

حمد الله على السلامة ياماماتو
يارب الأول تكون موفق جداً فى دراستك وحياتك كلها
بصراحة القطة عندها شوية حق فى اللى بتقوله بس برضه بدون تحامل على الشباب يعنى المسؤولية متوزعة بين الشباب والحكومة والقطر

الخوف بقى أنا بعتبره عدو التغيير الواحد يقعد يغير سنة وييجى فجأة يخاف يبوظ كل اللى عمله ويوقف ويجيله احباط لكن ده بيتنافى مع التوكل على ربنا واللى بيخاف يبقى هو حاسس انه ميستاهلش الحاجة اللى جايه لأنه مقصر .

بس ايه القطة التنكة اللى مديانا قفاها دى ياماماتو وكمان معترضة على الشيبسى...عموما مشكورة على انها رجعتك للمدونة بالسلامة .. عود حميد وأتمنى لك كل التوفيق

mamato2010 يقول...

السلام عليكم
أشكرك على التعليق
الحمد لله أنا موفق الى حد ما فى الدراسة.و احب اقول ليك ان الشباب هو اللى بيرمى فشله كله على الظروف و القدر والحكومة.هو فعلا الحياة زفت و البلد تقرف.لكن اللى عاوز يعمل حاجة بيعملها وبجد الشباب ممكن يبتدوا السلم من أوله لكن الكل عايز الحجة على الجاهز.طب انا اهه طالب والحمد لله اللهم ديمها نعمة بشتغل.مابالك المتخرج.
اما بالنسبة للقطة دى فأنا كنت قاعد على النيل فى الزمالك ولقيتها فقلت أصورها و أنا بصورها ادتنى ظهرها.فالصورة دى هى اللى ادتنى فكرة الموضوع.
و أشكرك ثانية على الزيارة.

سراج يقول...

أن أسمع اللهجة المصرية نعم أفهمها لكن أن أقرأها فذلك يرهقني، ولا أفهمها إلا بعد إعادتها عدة مرات، لكن لا أدري هنا لم أعاني عند قراءتها، أتصور أن أسلوب الحوار كان ممتعاً
أعجبتني الفكرة.. وأتفق معك تماماً لكن مالا أتفق معك فيه هو أننا نخاف من النجاح.. تحياتي

mamato2010 يقول...

السلام عليكم
سراج
أحمد الله على ان كتابتى كانت سهلة وانك قدرت تقراها.واحمد الله ايضا على ان موضوعى كان سهلا وبسيطا وممتعا كما اشرت فى تعليقك.واتمنى ان تزور مدونتى بشكل دائم.سلام

nour shahen يقول...

جميل الحوار وانا معاك جدا انه ممكن يكون تكاسل
بس فى شباب بتشتغل مش كل الشعب قاعد في البيت ولا بيعاكس في الشوارع ولا بيخرف علي الانترنت

وفى فعلا بيفكروا انهم يلاقوا شغل احسن لكن مش في مقدرتهم يدرسوا لا انجليزى ولا كمبيوتر

في فعلا قرصات تمنها بسيط وفي قرصات تمنها غالى بس فى ناس لا تقدر علي دا ولا على دا

ودول بقى بيشتغلوا فى اى مكان يتوفر كعماله وينطحنوا في وسط الحياه
الله يكون في عون الشباب

خالص تحياتى

شبــ اون لاين ـــاب يقول...

السلام عليكم
بجد انت خيالك ملوش حل


بس انا مش موافق القطه خالص

فيه شباب بينزل ويدور و بيشتغل اى حاجه لحد ما ربنا يفرجها

بس ممكن يكون القطه هى اللى متشائمه شويه

و انا عارف و متاكد انك بتكلم شريحه معينه من الشباب

و اخر حاجه

انت بتغييب كتير ليه كده هااااااا

___________________________
كان معك من امام الكيبورد
واحد مخه لاسع شويه
شبــ اون لاين ــاب
الاسكندريه
________________________

كـــيــــــــارا يقول...

مش معاك خالص في الكلام ده

لان في كتير بيشتغل وبيكمل دراسته

وبيدور علي شغل ويبذلو مجهود

الفئه اللي اتذكرت علي لسان القطه ده فئه صغننه وقليله

يا مراكبي يقول...

شيبسي؟

لكن لو كان معاك حتة لحمة كان الموقف إتغير لصالحك .. ههههه

لكن هي عندها حق .. أكتر من البني آدمين

walaa gobashy يقول...

ههههههههههههههههههههههههههههه
والله قطة لبقة وصريحة وواضحة
وبصراحة بقي مش بتخاف قالت اللي شيفاه وبمنتهي التحدي
بس يارب احنا نفهم
تقبل تحياتي