الجمعة، 7 أغسطس، 2009

إزاى تصطاد الفكرة ؟ How to hunt an idea?1



بعد طول غياب. و ايام مليانة بالتعب والعذاب . رجعت ليكم بموضوع جديد . مهم و مفيد . لكل الناس بالتأكيد .

وحاولت أبسطة على اد ما اقدر ودى خلاصة تجربة سنة فى مجال الإعلانات . وهو إزاى تصنع فكرة ؟.

و انا الصراحة إكتشفت إن الموضوع بسيط جداّ و إن الأفكار موجودة فى كل مكان و مرمية على الأرصفة فى الشوارع . بلاش رغى كتير بقى و تعالوا ندخل فى الموضوع . أنا لقيت إن فى طريقتين لإيجاد الفكرة :1- فكرة الموقف ، 2- فكرة الأشياء المجردة.


1- فكرة الموقف : يعنى أنك تشوف موقف حتى لو مشهد صغير و تحط نفسك فى الموقف ده و تتخيل إيه اللى وصلك للموقف ده وحصل كده إزاى و ممكن بعدين يحصل إيه و ينتهى بيك على فين . يعنى إنت اللى تكتب السيناريو على كيفك .


مثال : كنت مرة و أنا فى السوبر ماركت شوفت اسرة مكونة من اب و ام و طفل عمرة لا يتعدى الخمس سنوات. المهم و هما واقفين بيشتروا . لقيت الولد إختفى من ابوه و أمه و كنت شايفه و هو مستخبى و لكن حبيت اشوف الموقف للنهاية .المهم بعد ما لقوا الواد .أنا شفت على الواد ملامح باردة و غيظ يعنى الواد مكنش بيهزر مع ابوه و امه . قمت انا حطيت نفسى مكان الواد ده و تخيلت قصة عجيبة .( تخيلت إنى ولد شاطر جداّ و ذكى ولكن أبويا و أمى مش مهتمين بيا خالص ولا حتى عارفين انا متميز فى ايه ولا هواياتى إيه . و كل اللى كان يهمهم إنى اكون شاطر فى دراستى و بس غير كده مش مهم بالنسبالهم . فانا كنت بحاول ألفت انتباههم بأى شكل من الأشكال ولكن بدون جدوى . قمت حاولت الفت إنتباه زملائى فى المدرسة و إنتباة المدرسين . فقمت سرقت قلم من اصحابى علشان يقعدوا يدوروا على اللى سرق .لحد ما يكون فى واحد من زملائى فى الفصل حيكون أخد باله و الولد ده كان من العيال البايظة . و حيحاول الولد ده إنه يهددنى إنه يقول للمدرسين إنى اللى سرقت لو ما نفذتش اللى هو عاوزه . وبعدين هو بقى يخطط للسرقات فى الفصل و انا اللى أنفذ لأنى شاطر و محترم فى الفصل فبالتاكيد محدش حيشك فيا .إلى ان نكبر أنا و الولد البايظ ده و نبقى عصابة صغيرة و يبقى هو العقل المدبر و أنا المنفذ بحكم إنى هكون متخفى وراء وظيفة محترمة و مركز إجتماعى محترم و محدش حيشك فيا ) . بس يعنى ممكن أنتم بقى تتخيلوا إيه اللى ممكن يحصل بعد كده.


و بالشكل ده تخيلت قصة كاملة من موقف صغير . بمجرد إنى حطيت نفسى فى الموقف . فبعد كده طول م إنت ماشى إتفرج على المواقف و حط نفسك جوه الموقف وكون الفكرة أو القصة بتاعتك.


أما النوع التانى من إيجاد الفكرة هو فكرة الاشياء المجردة و ده حنتكلم عنه فى بوست تانى إن شاء الله.


المهم أنا عاوزكم تبعتولى التعليقات على الموضوع بإختيارك لموقف معين أو مشهد صغير إنت شفته فى الشارع . و تقوم بتكوين فكرتك الخاصة أو قصتك و صدقونى جربوا وحتلاقوا الموضوع ممتع و لذيذ .




يتبع



هناك 7 تعليقات:

شبــ اون لاين ـــاب يقول...

السلام عليكم ورحمة الله وبركاته

اخبارك ايه يا رب تكون بخير

بوست جميل وانا اول لما القى فكره

هاجى تانى واقولك

ومتتاخرش علينا بباقى البوست

ومتنساش تسلم على صحبك الى كان معاك

فى المدونه

فى رعايه الله

Joker

بزنس تعيش يقول...

يااااااااااااااااا

حمدا لله على السلامة


وحشتنا يا ماماتو


بس كويس انك رجعت من عالم الاعلانات


لتقدم لنا خلاصة الافكار التسويقية والترويجية


لتفيد الشباب بها

------------------------------

الفكرة مهمة اوى فى عالم البيزنس


ومهما كانت بسيطة


لو اهتمينا بيها
ممكن نوصل لحاجات كبيرة

والقاعدة بتقول: ابدء بالممكن لتصل


الى المستحيل

عجبتنى جدا كلمة ان الافكار مرمية على الرصيف

لانها حقيقية
----------------------------

طبقا للشراكة التدوينية بين مدوناتنا


ومدونتك

فاحنا هنعتبر البوست دا البوست الخامس فى سلسلة ازاى تكسب من الهوا

---------------------------
مع تحياتى / حازم ربيع

لاسع افندى يقول...

انا طالع الشارع ادور فى الرصيف على فكره

باى

micheal يقول...

بصراحة مفيش في دماغي موقف معين دلوقتي بس بجد أحييك وأحترم طريقة تفكيرك ونظرتك للأمور

عطش الصبار يقول...

السلام عليكم
فكره كويسه ممكن تعمل كتاب قصه كويسين
وممكن تعيد تشكيل فكرنا لاننا لو حطينا نفسنا مكان الناس اللى هالفعنهم موقف ممكن حاجات كتير جوايا تتغير
اما الفكره هاخدها من نفس الموقف اللى انت كتبت عنه انا بقى هاحط نفسى مكان الام واتخيل ان ابنى ضاع وهيبقى فيه كام نهايه حسب الابن وقع فى ايد مين لوقع فى ايد واحده شحاته غير لما يقع فايد رعيم عصابه غير لما يقع مع واحد ماعندوش اولاد غير حاجات كتير هتيقى النهايات الدراميه مختلقه لكن النهايه السعيده ان ابنى يرجع لحضنى واتعلم درس من الخضه انى ما اسيبوش من ايدى
ايه رأيك يا استاذ محمد عرفت اصطاد فكره
بوست حلوقوى بيحمل افكار جديده
تقبل تحياتى

micheal يقول...

في إنتظار جديدك
كل سنة وأنت طيب
تحياتي

يا مراكبي يقول...

كلام مظبوط جدا

حتى القصص الصغيرة والمقالات بتتولد كده

إما من لمحة خاطفة لموقف بيحصل قدامنا

أو بسبب شيء نتأمل فيه .. أي شيء .. أنا مرة كتبت موضوع كامل عن الإستحمام بسبب إني لمحت الكوز .. بجد مش هزار