الاثنين، 4 أغسطس 2008

ربع جنيه !!!

من الأول كده أحب أعرفكم حاجة .أنا ولا شاعر ولا حاجة و لكنى بحب أكتب أفكارى و تخاريفى دايما سواء كتابة عادية أو كتابة متبوعة بوزن و قافية الى حد ما . زى ما تقولوا كده بحب ألحن أفكارى . و القصيدة الصغيرة اللى أنا كاتبها دى معرفتش أكتبها نظام كل بيت شطرين والكلام ده فكل شطرين حيبقوا فوق بعض و بين كل بيت والتانى العلامتين دول( **) أسيبكم بقى مع التراهات و التخاريف بتاعتى بس بأمانه كل واحد يقرا الموضوع ده يعلق عليه .

قصيدة ربع جنيه !!!
********
أنا اللى بالاحلام تايه
مش لاقى مكان أروح ليه
**
ولا عمرى كنت فى يوم ضايع
زى اليوم اللى أنا فيه
**
حيتان فى دماغى بتتصارع
على حتة سمكة فيليه
**
مش عارف أكمل فى الطريق بتاعى
اللى انا ماشى فيه ؟
**
وللا أحود من تانى
جايز ألاقى بر أرسى عليه
**
كنت فاكر نفسى عنتر
وللا حتى سيباويه
**
لكن عرفت أنى أهبل
ولا ساوى حتى ربع جنيه
مستنى تعليقاتكم
محمد السروجى

هناك 27 تعليقًا:

أحمد عبد العدل يقول...

السلام عليكم
أعتقد ان المشكلة ان أفكارك أكتر من مشاريعك الفعلية
ابدأ خطط لحاجة واحدة واعمللها جدول زمنى هتلاقى الحياة أصبحت أكثر هدوءاً
وتأكد انك ممكن تمتلك مليون فكرة كلهم هايلين .. الّا انك لن تستطيع تنفيذ غير فكرة واحدة فى نفس الوقت واصرف النظر تماما عن الأفكار الأخرى حتى يمكنك الابداع
اختار فكرتك وانشغل بيها ومتتلفتش وراك..وربنا معاك
وامسح البيت الأخير ده لأن مكانك فى الدنيا بيكون حسب انطباعك الحقيقى عن نفسك .. وأعتقد انك مش كده ... يعنى مش أقل من خمسة وسبعين قرش مثلاّهههه

mamato2010 يقول...

السلام عليكم
أحب أشكرك يا أحمد على النصايح الغالية دى .لكن موضوع أنى أخطط لحاجة واحدة دى مش صح أوى يعنى أنا متهيألى فى الموضوع اللى فات قلت انى ناوى أعمل تلت حاجات و هى أنى أكمل دراسة الايطالية و كمان أبدا فى أستعادة أمجادى فى الانجليزية بالاضافة الى شغلى اللى انا والحمد لله فيه دلوقتى .وكمان التلت حاجات عندى بيصبوا فى وعاء واحد يعنى اللغة الانجليزية لا غنى عنها أما الايطالية فأنا عايز أتقنها لأن فى حاجة فى دماغى ناوى اعملها ان شاء الله
أما شغلى فهو وسيلة لكسب المال حتى أستطيع ان أنفق على اللى أنا ناوى أعمله بالاضافة حيدينى خبرة كبيرة فى المجال اللى انا ناوى ابقى فيه فى المستقبل.بس يعنى أنا مش متشتت.أما القصيدة دى فكنت كتبتها فى الاسبوعين اللى فاتوا بعد الوعكة الدراسية اللى كنت بمر بيها.بس يعنى و على العموم يا سيدى تشكر على 75 قرش .فى مزاد أحنا و مين يزود.
معلش انا طولت يللا سلام

blue-wave يقول...

كدا مش صح يا محمد
بالعكس
لازم تعرف انك انسان
وربنا قال
ولقد كرمنا بنى ادم
يعنى انت تساوى كتير
عموما الإسلوب حلو وبسيط
بس ادى لنفسك حقها عليك
تحياتى

سلوى يقول...

كنت فاكر نفسى عنتر
وللا حتى سيباويه
**
لكن عرفت أنى أهبل
ولا ساوى حتى ربع جنيه

يعني مفيش وسط
إما عنتر أو سيباويه
أو إنك لا تساوى ربع جنيه

ده تواضع ولا عدم معرفه مقدار الذات ؟

أعتقد تواضع
لأن البوست اللي فات بيبين إنك إنسان طموح

ربنا يوفقك دايما :)

ولاء يقول...

هههههههههههههههه
والله يا محمد كلنا اوقات بنلاقي اننا ولا نسوي حته خمسة صاغ
بكللللللللل اسف
انما ماشاء الله بوست جميل وفكرة جميلة والتعبير بسيط وهادف
وقلبت علينا المواجع
تحياتي

أحمد عبد العدل يقول...

بالظبط ياماماتو
وعاء واحد .. ده اللى قصدت أقوله
ربنا معاك
تحياتى


ماماتو ..لو سمحت ممكن تلغى تأكيد الكلمة علشان أخوك نظره على أد أده؟

miada ref3at.. يقول...

همممممممم ازيك يا محمد..
شكراً على الدعوه ..

بالنسبه للقل البوست اللى انت كتبته..
جميل جداً..
بس فى حاجتين عاوزه انوه عليهم..
يعنى ليه التشاؤم وانك لاتساوى الا ربع جنيه دى..

يا محمد لو مكناش نساوى يبقى مكناش اتخلقنا بقى..
انت كده بتعيب فى ذات خلق الله..

الحاجه التانيه..
عاوز تحس فعلاً انك تساوى كتير يبقى نحاول نكون لينا بصمه فى الدنيا..
مش شرط نعمل لنفسنا ..ممكن نعمل لغيرنا..
يكون لينا حاجه صح فى دنيتنا دى يقولوا بعدها ده محمد قال وعمل وكان ليه الشأن الفولانى..

لكن انا عندى يقين فيك لان واضح منك ومن ردودك انك انسان طوح..

عذراً للإطاله..
وعذراً كمان انى مش بكتب بوستات اليومين دول لانى مشغوله بعض الشئ..فالوحى مش موجود هههههه..

دمت سالم..

nour shahen يقول...

السلام عليكم ورحمة الله وبركاته
ههههههههههه
انت واصف نفسك وصف فظيع حد يقول علي نفسه كدا
هو كويس ان الواحد يعمل وقفه مع نفسه لكن مش لدرجة انه يقلل منها كدا
يمكن الواحد فينا مش عنتر ولا سباويه ولكن بيتميز بشيءعن غيره بالتأكيد
وفيه شيء جميل غيره بيفتقده
كلماتك جميله ومرتبه تحياتى ليك
اتمنى لو تشيل تأكيد الكلمه علشان يكون التعليق اسهل

mamato2010 يقول...

السلام عليكم
بلو ويف
أحب أقول ليك شكرا على قرائتك لوموضوعى.أما بالنسبة لأنى مش مدى لنفسى حقها فده مش مظبوط أوى لأنى نوهت فى البوست أن ده كان فترة أول ما عرفت النتيجة.لكن أنا أشرت فى البوست اللى فات أنى ناوى أن شاء الله أثبت ذاتى و نفسى و أن ربنا كرمنى كرم كبير.و أنا مش حزين ولا حاجة.بس أنا حاجة كتبتها و حبيت أنشرها.و شكرا مرة تانية و يا ريت ما تقطعش الزيارات و التعليقات.سلام

mamato2010 يقول...

السلام عليكم
سلوى
أحب أشكرك على اهتمامك على قرايتك للبوست و تعليقك عليه.أما بالنسبة لأخر بيتين فأنا أقصد بيهم أنى كان عندى ثقة بالنفس زيادة.و أول ما عرفت موضوع النتيجة دى أفتكرت أنى كنت فى وهم كبير .لكن الحمد لله أنا مش زعلان بل الحمد لله دلوقتى بقت ثقتى بنفسى أكبر من الاول.ما تقطعيش الزيارات.سلام

mamato2010 يقول...

السلام عليكم
ولاء
أحب أشكرك على قرايتك للبوست و كمان على وصفك للتخارف بتاعتى أنها هادفة.وأنا أسف أنى قلبت عليكى المواجع.و اهو كاس بيعدى علينا كلنا.ما تقطعيش زيارتك بقى .سلام

mamato2010 يقول...

السلام عليكم
ميادة رفعت
شكرا للزيارة.أحب أقول أنى مش متشائم ولا حاجة لأعلمك و الحمد لله أنا أكتر واحد فى الدنيا متفائل.لأنى مؤمن بحديث الرسول"تفاءلوا بالخير تجدوه"صدق رسول الله.
بس أنا كتبت القصيدة دى لما عرفت النتيجة يعنى أثناء الوعكة الدراسية.و الحمد لله الواحد لحق نفسة.
أما بالنسبة لربع جنية فأنا مش بقلل من شأنى كمخلوق.أستغفر الله فأنا أنسان قد كرمه الله سبحانه و تعالى.و لكن أنا كنت بقلل من شأنى لانى حسيت أنى ممكن أكون قصرت أو كنت عندى فى لحظة من اللحظات ثقة زيادة عن اللزوم.و لكن والحمد لله أنى تيقنت أن ده قدر ربنا .بس يعنى و بجد شكرا للأهتمام.سلام

mamato2010 يقول...

السلام عليكم
نور شاهين
شكرا لأهتمامك بالزيارة و القراية و التعليق.انا قلت أن الكلام ده كان أثناء الوعكة الدراسية و دى كانت لمدة يومين بعد معرفة النتيجة و الحمد لله انا لحقت اعمل وقفة مع نفسى.و اهه ربنا يكرم . وشكرا على الكلمات الرقيقة دى و ربنا يكرمك.سلام

عصفور المدينة يقول...

يا عم انت تساوي كثير استعن بالله ولا تعجز

Sherif يقول...

ليست هناك نهاية العالم ..
نهاية العالم هى حين نتوقف عن رمى السهام .. ونستسلم للإحباط ..

إرادتك قوية .. وهذا مافهمته من البوست الماضى وهذا أيضا .. أحسن الناس بيفشل .. اينشتاين كان ساقط ميكانيكا .. النتيجة انه هدّ ميكانيكا نيوتن من الاساس .. بيل جيتس ملك الميكروسوفت لم يتم دراسته حين صنع أول حاسب شخصى ..

طب علشان نساوى مليون جنيه مش ربع جنيه نعمل ايه .. ندور على نموذج ناجح نعرفه .. ونقلده .. فى الأول صعب .. بعد كده هانتعلم يعنى ايه تطبيق صحيح ..

جميل ان تجد منتدى تبوح به .. كلنا يفعل ذلك .. الأهم نشوف نماذج ناجحة كتير .. قبل مانبدأ ..

الشعر كالموسيقى .. له وزن نحسه بالأذن .. يبقى نسمع أو نقرا شعر كتير .. وكتير جدا .. قبل مانكتب على الورق ..

الفكرة جميلة .. والاحساس صادق .. الصياغة تحتاج بعض التعديل

تحياتى لك .. وانا متأكد ان طموحك كبير لأنك بتشتغل من وانت طالب .. غيرك كثير لايفعل شيئا مفيدا ..

فى اعتقادى .. هذا شئ عظيم جدا .. لأنه ينم عن احساس بالمسئولية

حـــــدوتـــــة يقول...

السلام عليكم

متقولش على نفسك كدة
متطمعش حد فيك

سلالالالالالالالالالالالالالالالالالالالالام

يا مراكبي يقول...

محاولة جيدة على فكرة .. لكن طبعا محتاجة ظبط الأوزان بين الأبيات .. يعني ممكن لو إختصرت كذا كلمة عاملة وزن طويل بكلمة واحدة تدي نفس المعنى هتلاقي الوزن ظبط على طول

يعني حاول تغنيها على أي لحن وإنت هتعرف على طول إيه هي الأوزان اللي مش متساوية

أحمد كمال يقول...

مش لدرجة ربع جنيه يا محمد ، ده انت كريم جدا ، كرمك رب العالمين ، و ماحدش ممكن يهينك غير نفسك ، و واضح إنك فاهم كده كويس ، و إنك ناوي تضرب عنتره و سيباويه كمان :)

ربنا يعزك ، و يهديك لما ينفعك ، و ينفع بك الإسلام .

Noha El-arabi يقول...

مش عارفة ليه يعني بيقولولك انت تساوي اكتر من كده، هو لازم تكون بتكتب عنك، الشعر لوحده حالة
و الحالة حلوة و عجباني و الرمز كمان
ربع ججنيه ربع جنيه بس نعيش
:)

dr.Roufy يقول...

لذيذة بجد يا محمد
على فكرة انت عندك روح الشاعر الساخر فعلا
يعني لو قريت أكتر..وحطيت الموضوع في دماغك هاتبقى فعلا شاعر مميز جدا
كل التحية
:)

mamato2010 يقول...

السلام عليكم
عصفور المدينة
تشكرى جدا على الاهتمام ده و يا ريت لو تقوليلى أنا أسوى كام

mamato2010 يقول...

السلام عليكم
شريف
أحب أشكرك على الاهتمام.أما بالنسبة لموضوع القدوة فأنا واالحمد لله ليا أكثر من قدوة فى حياتى و أولهم الرسول(ص) اللى أتعلمت منه الصبر والاصرار.أما بالنسبة لو أنت حاسس أن فى أخطاء فى الشعر اللى أنا كاتبة فياريت تبقى تقوللى على الصح أو التعديل اللى فى وجهة نظرك.

mamato2010 يقول...

السلام عليكم
حدوته
تشكر يا عم على الزيارة التخاطيفى دى.و أنا أعمل ايه الناس هى اللى طمعانه فيا.واد حليوة بقى تعمل ايه.

mamato2010 يقول...

السلام عليكم
يا مراكبى
شكرا على الزيارة و الأهتمام و يا بعد أذنك تبدى رأيك بصراحة يعنى الاخطاء اللى أنت شايفها تبقى تقولهالى يعنى الكلمات اللى مبوظة الوزن وكده يعنى علشان الصورة تبقى واضحة أكتر.سلام

mamato2010 يقول...

السلام عليكم
أحمد كمال
بجد مش حقدر أقول ليك غير شكرا على الزيارة وربنا يتقبل منك دعاءك و ينفع بينا كلنا الاسلام.اللهم أمين

mamato2010 يقول...

السلام عليكم
نهى العربى
والله يا نهى أنا مش عارف أنا ياما وضحت أن الشعر ده حالة مش أكتر و أنا كتبته فى لحظة كنت مخنوق فيها و الحالة دى و الحمد لله لم تدوم أكثر من يومين.بجد بجد أنا بشكر و أحنا من النهاردة أصدقاء فى التدوين.سلام

mamato2010 يقول...

السلام عليكم
دكتورة روفى
بجد أشكرك على الزيارة ولاهتمام و كمان الشرف العظيم اللى أنتى أديتهونى بأنى ممكن أبقى كاتب ساخر.و أحب أقول ليكى انا كتبت حاجات كانت ساخرة لو تفتكرى أيام روح الفدا.و أنا لما ببقى مخنوق بحب أتتريق على الدنيا من حواليه و خاصة على نفسى مش أكتر.وسلام