الأحد، 27 يوليو 2008

ترميم كا ئن يدعى ماماتو

أنا المدعو ماماتو الطالب بالفرقة الثالثة-تجارة عين شمس-و الدارس بل العاشق للغتين الإنجليزية و خاصة الايطالية . والذى خطت قدماه كبرى الشركات المالتى ناشيونال للعمل بها و هو طالب و المحب دائما للنجاح و التميز-النجاح العملى-لقد رسبت السنة دى يعنى سقطت و هعيد السنة دى على أربع مواد. يا ترى هى دى نهاية الدنيا و السؤال الذى يطرح نفسه " هل انا فاشل ؟ " .
أنا عن نفسى بعتبر أن دى منحة من الله و ليست محنة - كما يعتقد البعض- لأن السنة دى حتساعدنى فى حاجات كتير أعملها فيها
بس المشكلة مش فى أنى زعلان أو فرحان. المشكلة فى أهلى و خاصة أمى اللى حتموت نفسها من الزعل-طبعا بعد الشر عليكى يا أمى-و اناوعدتها ان السنة دى حستغلها فى حاجات كتير منها:
1. سوف استغل السنة دى فى تطوير اللغة الايطالية و أكمل دراستها و اصل فيها الى حد الاتقان. إن شاء الله
2.أراجع على اللغة الانجليزية التى كادت ان تنهار من قلة أستخادمها. إن شاء الله
3.سوف أنجح فى شغلى الجديد الذى سوف أقبل عليه 1/8 فى إحدى شركات الدعايا و الإعلان. إن شاء الله

أما الذى لم أوعدها به هو أنى لم و لن أتفوق فى هذة الكلية غريبة الاطوار و لكنى بإذن الله لن أرسب فيها أبدا.

المهم هو هل سأستطيع أن ألتزم بتنفيذ و عدى ؟ هذا هو السؤال!

هناك 19 تعليقًا:

أحمد سلامــة يقول...

على فكرة كانت من امتع والذ واهم سنين حياتي
المهم متعديهاش بسرعه
وتستمتع بيها على اد ما تقدر
وتتاخد منها الخبرات اللي بتاخد سنين عشان تكتسبها
ومفيش مكان لحزن ولا زعل
خلاص بقى احنا كبرنا مش كارثة يعني
ولا ايه :)
؟؟
الف مبروك المدونة

سلوى يقول...

مبروك المدونه

ربنا يوفقك إن شاء الله

وشكرا للزياره :)

إنت كتبت جمله وإن شاء الله هتنفذها
وهي

لكنى بإذن الله لن أرسب فيها أبدا.

وده إن شاء الله اللي هيحصل

ربنا يوفقك في شغلك وحياتك

تحياااااااااتي

أحمد عبد العدل يقول...

أهتم جداً بشؤون التعليم فى مصر وأعرف أن التفوق الدراسى لا يعنى بالضرورة أنك شخصية جيدة ولكن لأنها سنوات محسوبة من عمرنا ولأنك ما شاء الله واضح انك منميز فى مجالك العملى حاول ألّا تخسر المزيد من وقتك لتتفرغ للإبداع فى عملك والاهتمام بمهاراتك .. لازم تتخذ قرار حازم بينك وبين نفسك واربط انتهاءك من الكلية ببداية مشاريع أخرى تتوقع الابداع فيها حتى تجد الحافز دائماً .. ربنا معاك

blue-wave يقول...

تمام يا بطل
مش مهم سنه
المهم انك تستفاد من سقطتك وتقوم منها بسرعه
ربنا معاك

بنت مصريه يقول...

اولا مبروك عالمدونه يا محمد
صدقنى يا محمد وعسى ان تكرهوا شيئا وهو خير لكم محدش عارف الخير فين

وسلملى على والدتك
وقولها انجى (بنت مصريه)
بتقولك ما تزعليش يا ماما
ربنا قدر كده ودا اللى حصل خلاص
تزعلى وتقهرى نفسك ليه يا ست الكل
وان شاء الله محمد هيبيض وشك السنه الجايه وهيخليكى تزغرتى م الفرحه

ايه فيه ايه مش انت وعدت ماما بكده
ومش هيه بس وعدتنا احنا كمان


ربنا يكرمك السنه الجايه يا رب وتنجح بامتياز كمان

بنت سيناء يقول...

ان شا الله توعدها بالخير..والرسوب هو بداية الطريق وليس نهايتة..هناك حكمة انجليزية تقول..مش مهم..افشل؛؛حاول افشل مرة اخرى ..ولكن بطـ أفضل ـريقة..الى ان تصل للمراد..تحياتى

mamato2010 يقول...

أحب أشكر كل اللى زارونى وكل اللى حاولوا يقفوا جنبى فى أثناء محنتى من خلال تعليقات المدونين.مع أنى والله العظيم بعتبرها منحة من الله وليست منحة كما أشرت فى الموضوع وحشكركم واحد واحد
شكرا لأحمد سلامة
شكرا لسلوى
شكرا لأحمد عبد العدل
شكرا بلو ويف
شكرا لبنت مصرية
شكرا لبنت سيناء

miada ref3at.. يقول...

السلام عليكم..

أولا مبروك على المدونه الجديده وان شاء الله تكون فاتحة خير عليك..
اللهم آمين..

ثانياُ احييك على الروح الرياضيه اللى انت بتمتلكها وخاصه الحماس اللى عندك..يعنى كتير من الناس ترسب فى السنه وتحس بالعجز دايماً لكن ما شاء الله انت عندك ارادهوعزيمه..

والمفروض السؤال الاخير اللى بيطرح نفسه ده ميطرحش نفسه..لان بإيدك انك تتحدى اى صعاب مهما ان كانت والباقى على الله عز وجل..
ولكن الأخذ بلأسباب اهم شئ..
ومدام فى اراده مع حب كل شئ يمشى ان شاء الله وخاصه ان جواكى عاوز ترضى والدتك ربنا يخليهالك..

طولت عليك ولكن انا بقول اللى انا بحسه مهما ان كان..

واتمنى قبولى زائره فى اول مره ليا..

ودمت سالم..

زى الهوا يقول...

بحييك بجد علة الاصرار دا , عادى هتعدى إن شاء الله , هيه تالتة صعبة شوية , بس هتعدى إن شاء الله وهتجيب تقدير السنة الجاية إن شاء الله

وفعلا هيه فرصة ليك تقوى السى فى و حلو انك طموح وبشتغل اهوه , ربنا يعينك

sahr يقول...

كلنا محتاجين لترميم
المهم نكون عارفين ايه اللي عاوز يترمم

mamato2010 يقول...

السلام عليكم
شكرا جدا يا ميادة و أنا بحاول دايما يكون عندى روح رياضية علشان أعرف أعيش فى الحياة اللى بقت غريبة مش عارف هى غريبة فى ايه بس والله فيها حاجة غريبة غير كده أنا دايما فى حياتى علشان أعرف أعيش وأنا راضى دايما أحمد ربنا على كل حاجة وعلشان أقنع نفسى بحمدة بعتبر أى حاجة تحصلى سيئة فى نظر الناس أنها منحة لى دونا عن الكل و انا صراحة مش زعلان الا علشان أمى فعلا كانت زعلانه بس هى الحمد عرفت أنى مش انسان تافه وانى مش حضيع السنة دى منى ان شاء الله
اما بالنسبة لزى الهوا أنا و الحمد لله عندى أصرار هو مش كبير أوى بس أنا بحاول أنميه علشان أقدر أتغلب على الحياة و أنا مؤمن بمقوله قالها بيل جيتس " أنا أستطيع أن أفعل كل شئ أضع كل تفكيرى فيه" .بس يعنى فأى نجاح فى الدنيا مبنى على الاصرار و أنا مستعد أجيب صور و نماذج من حياة الناجحين كلها مبينية على الاصرار والتحدى
أما بالنسبة لعيون السهر فأنا أشكرك و أحب أفكرك ان أحنا أصلا أصحاب فى التدونين بتاع حوالى سنة من أيام روح الفدا لو تفتكرى.وفعلا كل مننا محتاج لترميم بس الواحد يعرف فعلا أيه اللى عاوز يترمم.و انا كنت فى الموضوع ده برمم ثقتى فى نفسى و ارادتى وعزيمتى اللى كادت أن تنهار و الحمد لله رب العالمين أنى لحقت نفسى فى الوقت المناسب بأنى كتبت اللى جوايا و أنكم شاركتونى بالردود دى اللى خلتنى أشم نفسى من جديد.و أرى النجاح كالقطار يجرى أمامى و أحاول اللحاق به لأصل فى الميعاد.
أنا أسف على التطويل بس أنا بموت فى الفضفضة والرغى و اللت و العجن.
و السلام عليكم و رحمة الله و بركاته

حـــــدوتـــــة يقول...

السلام عليكم

مبروك على المدونة يا باشا

اولا كلية التجارة مش غريبة الاطوار ولا حاجة
لو انت دخلتها غصب عنك او عشان مجموعك
تبقى دى مشكلتك انت
ثانيا شعورك ان اللى حصلك ده منحة مش محنة
ده كرم من ربنا فى ناس غيرك بيحصلها العكس
استغل السنة ذى ما قولت وحاول تريح والدتك وتخليها تدعيلك

سلالالالالالالالالالالالالالالالالالالالالالالالالالالالام

tulip_rose walaa يقول...

شوف بقي مبدئيا كده اذا قادر تحقق ذاتك بره اطار كونك خريج بشهادة من الجامعة فانت ناااااااااااااااجح جدا كمان وخاصة انك مش مكتفي بعمل وانما بتنمي قدراتك اللغوية
انما طبعا رأي والدتك فهي زي كل الامهات نفسها تتخرج وبقي خلصت المشوار معاك وده شعور طبيعي داخلي عند الوالدين دايما
اهم شيء اوعي تضيع وقتك في التعليم يعني بجد تنفذ وعدك وتخلص من التعليم الاكاديمي ده خااالص واتفرغ لحياتك العملية لانها الاهم طبعا
مش كل متفوق علميا ناجح ومش كل ناجح متفوق علميا
ربنا يوفقك يارب

mamato2010 يقول...

شكرا يا يا حدوتة أنا ما دخلتش الكلية دى غصب عنى ولكن كان مجموعى مش جايبلى غير علوم و تجارة ولكنى قلت مش ناقصة علوم فدخلت تجارة. لكن أنا عمرى ما حبيت الكلية فقررت أنى أدرس حاجات تانية و أغير مجال عملى بحيث أنه يبقى بعيد عن التجارة و أنا حبيت مجال اللغات و خاصة الايطالية و الحمد لله ربنا كرمنى فى اللغة دى زى الانجليزى و الحمد لله ربنا كرمنى فى انى أشتغلت فى شركات كبيرة بجد ما حدش يحلم بيها ابدا و ما كانتش بواسطة.
أما بالنسبة لولاء انتى عندك حق لازم الواحد يخلص الدراسة اللى هى ضرورى أنجازها حتى ولو علشان أتجوز بيها و علشان الواحد يبتدى يركز فى حياته العملية و أثبت نجاحى الحقيقى أمام العالم أجمع.
أحب أشكركم لأهتمامكم بزيارتى فى مدونتى المتواضعة و ياريت ما تقطعوش جوابات.
سلام

dr.Roufy يقول...

أولا ألف مبروك على انضمامك لأسرة التدوين يا محمد
ثانيا ربنا يوفقك في الشغل الجديد, وتكون بداية فعلا جديدة ليك
ثالثا..ما يقع الا الشاطر
:)

شبــ اون لاين ـــاب يقول...

ماماتو
اول حاجه بجد مدونه جامده و احنا مش ناسينك
وبجد انت رفعت من روحنا المعنويه ع الكلمتين اللى انت كتبتهم عندنا

وانا راجين قريب اوى
بس هى ظروف

و انت لا فاشل ولا حاجه كل الحكايه ان البشر قدرات مش اكتر

ممكن لو كنت دخلت الكليه فى وقت تانى كنت عملت اللى انت متتخيلوش
ربنا يوفقك و سؤال رخم انت سبت التدوين ف روح الفدا و لا حاجه

mamato2010 يقول...

السلام عليكم
شكرا يا دكتورة روفى على الدعم المعنوى و ربنا يتقبل دعائك و يوفقنا كلنا فى الشغل أن شاء الله.

mamato2010 يقول...

السلام عليكم
أحب أشكر شباب أون لاين على زيارتهم لمدونتى أما بالنسبة لموضوع الكلية فأنا دخلت كلية التجارة لأن مجموعى يدوب كان الفرق بينه و بين الهندسة درجتين % فبالتالى دخلت تجارة علشان أكبر دماغى مع أنى بكرهها كره العمى.لكن الحمد لله قدرت أنجز حاجات تانية أثناء فرغى فى الكلية اللى ملههاش معالم و لا ليها أى حاجة.
أما بالنسبة لروح الفدا أنا ما بطلتش التدوين فيها ولا حاجة.بس أنا حبيت أنى يكون فى حاجة خاصة ليا فيها و كمان لسة روح الفدا حنعملها أعادة صياغة و برنامج ليها أن شاء الله.و لأى حد ما يعرفش مدونة روح الفدا حيلاقوها فى المدونات اللى انا ضايفها و ما زالت روح الفدا بالنسبة لى أنا وحازم ربيع هى المدونة الأم.
و أحب أشكر شباب أون لاين مرة تانية

nour shahen يقول...

ربنا يوفقك ويحققلك كل احلامك يا رب
الحكايه محتاجه صبر وشوية مجهود بس وربنا يكرمك
ومتندمش على شيء راح وركز فلى جاى واكيد هتحقق تقدم ملحوظ وربنا يقويك على دراستك وحياتك
تحياتى ليك