كنت قاعد فى مرة من المرات فى منطقة ما فى القاهرة و بأكل شئ ما .المهم و أنا قاعد جت ناحيتى قطة و عمالة تنونو. بس كانت واقفة بعيد شوية.فقمت مديت ليها أيدى بحاجة من اللى كنت باكله و كنت مستنيها تيجى تاخدها من إيدى. و هى مستنية أرميهالها. المهم فضلنا على الحال ده بتاع خمس دقايق.فقمت سألتها :
أنا: إنتى ليه خايفة تيجى تاخدى الاكل من إيدى ؟
القطة: يا عم هو انا بس اللى بخاف ! ماهو انتم كلكم بتخافوا .
أنا: إحنا. إحنا مين ؟
القطة: إنتوا البنى أدمين.
أنا: بنخاف من إيه؟
القطة: من حاجات كتير.بتخافوا من الحياة و بتخافوا من اى حاجة جديدة و بتخافوا من النجاح و بتخاوفوا حتى من بعض.
أنا: ينفع توضحى اكتر ؟ أنا مش فاهم .
القطة: يعنى بتخافوا دايما من بكرة.دايما متشائمين.و بتخافوا تغيروا من طباعكم وبتخافوا تغيروا رتم حياتكم. بتخافوا تقولوا رأيكم بصراحة.وبتخافوا من أنكم تنجحوا فى حياتكم علشان فكركم ان النجاح حيفقدكم أعز أصحابكم.أو إن النجاح بيجيب معاه مشاكل و وجع دماغ و أر و حسد.
حتى الشباب منفض للحياه.بيبقى قاعد فى البيت ما بيعملش حاجة غير أنه يا اما نايم يا بياكل يا بيتفرج على التليفزيون يا قاعد على الكمبيوتر يا اما على النت بيعمل كلام فارغ يا بيتكلم فى كلام فارغ و حرام. و لو نزل الشارع يا اما على القهوة يا اما مع شوية شلة فاسدة وتلاقيهم بيتكلموا فى كلام فارغ يا اما بيعاكسوا فى بنات.
أنا: حيلك حيلك.طب ماهى دى الحياة و الظروف صعبة و مفيش شغل و كده يعنى....!
القطة: قطعا عن حديث حضرتك. بس سيادتك الشباب اصلا ما بيدوروش على شغل.لسببين.
أنا:إيه هما ؟
القطة:أولا-لأن الشباب كسلان و مش عاوز يبذل مجهود.
ثانيا-أو أن الشباب خايف إنه يترفض لما يتقدم لشغلانه.و المشكله مش أنه خايف أنه يترفض و بس.لكن ده متاكد و مقتنع أنه مرفوض من قبل ما يقدم أصلا.هو الشباب عرف منين أنه حيترفض اصلا.مش يجربوا؟ لكنهم خايفين.
أنا: ماهى أى شغلانة دلوقتى عايزة كمبيوتر و إنجليزى بالاضافة للغة تانية .
القطة: يعنى هى اى شغلانة عايزة كده؟ ولا هى حجة؟ ولا هما بيدوروا على الشغلانات اللى فلوسها 5000:4000ج.
ولنفترض أن سوق العمل كله محتاج الحاجات دى.طب الشباب ليه ما بيدرسوش الحاجات دى ؟ لانهم كسلانين.أو أنهم خايفين يفشلوا فى دراسة اللغات و الكمبيوتر.
أنا: الصراحة عندك حق.طب ينفع أصور حضرتك صورة؟ علشان حنزل الموضوع ده فى المدونة بتاعتى و عايز صورة حضرتك تنور مدونتى .
القطة: لا يا عم شكرا .
أنا:ليه؟
القطة: أنا خايفة يا عم لحسن تطلع أمن دولة ولا حاجة أنا مش ناقصة. و مش عايزة حتى منك الشيبسى اللى انت بتاكله.سلام
أنا:سلام.
على العموم أهى قالتلكم انا كنت باكل أيه.و يا دوب كنت حصورها لكن لفت و أدتنى قفاها كما حال الكثير منا !!!!!!!!
